人心未回歸

唔只係港英年代大ge人心底唔舒服，我估土共中都有人唔開心。

係九七年之前，土共底層心中有港英此一鬥爭目標，鬥爭目標由香港政府布政司，同總督，到所謂港英走狗，即係香港警察。總之，港英政府贊成，土共係妄想中可以日日反對。

不過中共所謂收左香港，港英政府變成中共駐港傀儡政府，港英走狗巳成特區公安。中國人所謂當家作主，有所有資源係手，當年土共口中治港大計應該可以實行，中國人管治下美好香港理應出現。但現實係土共底層，即係香港草根階層生活一d都無好過，人工又無特別增加，最慘係當年生活或生存目標──鬥垮港英政府──此一大目標消失。雖然成日仲有上層向土共底層講，香港民主派係有外國反華勢力撐腰，要搞垮香港。不過土共底層心底知道，民主派係立法會係香港只係少數，可以搞到乜野出樣，唔通年輕人賣唔到樓同乜野地產霸權，係民主派搞成？

另一問題係土共受注意程度巳大不如前。九七前都話有人對你委以重任去對抗港英政府；依家目標無左，随左係立法會同區議會選舉時出山叫囂一下，平時都無乜作為。

=====================================================


隔牆有耳：龍獅旗人海中飄揚

一面龍獅旗，勾起唔少人嘅集體回憶。

民陣搞遊行兼容並蓄，甚麼訴求、口號、橫額、旗幟真係乜都有，香港雖然喺中共治下，不過你拎面青天白日滿地紅旗上街都冇人阻止，八方噚日見到有唔少人高舉港英時代支龍獅旗，雖然回歸已經 14年，人心回歸咗未，有目共睹。

藍色代表自由和平

周同學攞住港英旗上街，對殖民政府相當緬懷。許偉賢攝

其中一個舉起港英旗遊行嘅後生仔姓周，今年第一次上街，「回歸 14年，香港每日退步，中國搞到香港冇晒昔日光輝」。八方見佢年約廿幾歲，廣東話唔多純正，應該係番書仔識英文多過中文，睇唔出都係眷戀前朝「遺民」之一，佢望住支港英旗咁講：「你知唔知呢面旗嘅藍色代表咩？係自由、和平。家紅色、赤化咗嘅區旗，冇晒呢啲嘢嘞。」
八方係 7.1遊行常客，唔係第一次見到有人舉起面港英龍獅旗遊行，不過今年呢支前朝旗幟出現嘅密度，顯然高咗好多，其中一個原因，可能係因為「香港自治運動」今年喺維園大派龍獅旗仔。八方現場所見，呢面藍色旗十分搶手，幾大袋旗仔好快就派完，八方稍為慢半拍，空手而回。
香港自治運動在 facebook有個 group，佢哋長篇大論解釋宗旨：「是根據一國兩制觀念和香港《基本法》憲政秩序的本土意識促進運動……敦促香港政府在制訂各種公共政策和特別行政措施的時候，必須優先顧及香港人，以本土利益為本。」

民調指回歸管治差


呢啲主張，有幾多人認同、支持，八方唔知道，不過香港人眷戀前朝係事實，中大香港亞太研究所幾日前公佈一項關於市民對回歸前後生活情況比較嘅調查，結果發現有逾五成二人認為現時生活質素較回歸前差；五成八人認為回歸後經濟狀況差過 97年前；喺政府管治方面，更加有超過 66%人認為港英政府做得好過特區政府。
中大指市民覺得政府對深層次矛盾束手無策，所以普遍認為回歸後情況較差可以理解。煲呔 97年前已經係殖民地高官，點解回歸後越來越衰？佢話要做到最後一秒，不過香港人多一秒都唔想忍你呀！

mailto:pf_lee@appledaily.com